<<尋找替死鬼>>
(前幾日開始，facebook嘅update就開始有啲怪怪哋嘅現象，經常出現cannot connect 嘅畫面，到connect咗，又會 refresh唔到comment同埋like。唔想作出過多嘅揣測，立法之前，想講咩就盡量講，期望冇追塑期，可以喺呢個小小嘅空窗期，最後發吓聲，講吓真心說話。)
呢個weekend再次睇咗幾十集蠟筆小新，平衡吓咁低氣壓嘅環境同氣氛。雖然之前睇蠟筆小新恐怖系列驚咗一輪，但人總係犯賤嘅，又再次 click咗入去。今日同大家分享恐怖系列嘅其中一集 -- <<謎團重重的隊伍>>
故事講述小新約咗三個朋友，風間阿呆同埋正男出街，行行吓，見到條街有一條奇怪嘅 人龍，好多人排緊隊，好奇心驅使之下，佢哋就行埋去。出名咸濕嘅蠟筆小新，見到隊尾四個靚女姐姐，就同幾個姐姐開始搭訕。其中兩個姐姐就喺度講：小朋友我有啲急事 ,可唔可以幫我排住隊先，我哋好快返嚟。好色嘅蠟筆小新二話不說，唔理風間嘅勸諫，就即刻應承咗靚女姐姐，幫佢哋排住隊先。
呢四個姐姐露出詭秘嘅笑容，小新年同三個朋友就replace咗呢四個姐姐嘅位置。呢四個姐姐就頭也不回，急急腳咁離開咗。排喺蠟筆小新前面有個阿叔，見班靚女離開咗，就擰轉頭同蠟筆小新佢哋講：真係慘啦，年紀咁細，就遭遇咁不幸嘅事 …...
小新聽到呢個阿叔講啲咁恐怖嘅嘢，即時問阿叔究竟呢條隊係排緊啲乜嘢？阿叔就話：你哋最好就唔知好過知喇。小新見嗰四個姐姐冇返轉頭，就想即刻離開。阿叔就同佢哋講：嗰四個姐姐係唔會返轉頭，你哋亦都唔會離開到，呢條隊係只要你一開始排，就唔會離開到，唯一離開嘅方法，就係你要搵替死鬼代替你排，頭先嗰四個姐姐就係搵你哋四個小朋友做替死鬼。小新佢哋即刻面色一沉，努力咁嘗試離開條隊，但發覺點樣走，都好似被一股力量吸向前面咁。佢哋眺望個隊頭，發現有一間神秘詭異嘅屋，每次呢間屋開門都會有一個人行入去，閂返門之後，入咗去嘅人就冇再出返嚟。故事結尾係點？有時間嘅可以去睇一睇。當然蠟筆小新作為一個卡通人物主角，佢有無限復活嘅power, 係唔會死㗎。但呢一集卡通片嘅嗰種氛圍，齋睇都標冷汗。
睇完呢集蠟筆小新，覺得小新不幸上當排隊，好似香港嘅一個現象，就係香港買樓嘅現象。最近好多人話樓市回暖，再度熾熱，細價樓又再次超額入票。有一班人就好似蠟筆小新同佢嘅朋友一樣，冇睇清楚條隊排緊乜就排隊。
喺香港地買樓係乜嘢嘅概念呢？同呢個故事係不謀而合，香港地買樓就係一個尋找替死鬼嘅概念。你加入咗呢個隊伍，一開始做咗傻仔，用一個四五百萬嘅價錢，買咗一個比車位大小小嘅單位，然後你就一直等，等一個比你更不幸嘅人，做你嘅替死鬼。用高過四五百萬嘅價錢，付出比你更沉重嘅代價去接貨。
喺呢個咁唔穩定嘅局勢，喺疫情唔知幾時完嘅時刻，好多人都仲急住咁買樓，買一啲比劏房更細嘅劏房，好似買緊一個紙皮盒，裝住自己咁。可能大家都唔係好想出街，唔係好想面對呢個世界，所以好想買一個紙皮箱 封住自己，眼不見為乾淨啦。
Search